Иона Одесский

Акафист праведному Ионе, Одесскому чудотворцу

Кондак 1

Избранный светильнике земли нашея, преизрядный молитвенниче и чудотворче, православныя веры ревнителю и бесов прогонителю, благоговейно почитающе память твою, радостно восхваляем тя, праведный отче Ионо! Ты же, яко стяжавый велие дерзновение ко Пресвятой Троице, моли избавитися нам от скорбей и напастей, да зовем ти: радуйся, праведный Ионо, Одесский чудотворче.

Икос 1

Ангеле земный и человеке небесный, праведный отче Ионо, в земнем твоем странствовании был еси. Ангелоподобне бо пожив среди юдоли тления и греха, никакоже в себе огня духовного угасил еси, светло горя и облиставая всех, вопиющих ти: Радуйся, столпе огненный, всем путь ко спасению указующий. Радуйся, росо благодатная в знои искушений сущим. Радуйся, веры отеческия великий ревнителю. Радуйся, врагов Православия дерзновенный обличителю. Радуйся, Царя Христа рабе благий и верный. Радуйся, пастырю светлый и вселюбимый. Радуйся, врачевателю душ и телес преизрядный. Радуйся, чудотворче предивный. Радуйся, праведный Ионо, Одесский чудотворче.

Кондак 2

Видящи образ суетнаго мира сего, яко прелестен и скоропреходящ, отче святый Ионо, николиже пристрастием к нему омрачился еси. Горе очи сердца своего непрестанно возводил еси, единаго на потребу - вечнаго спасения взыскуя. Дух бо сокрушен и сердце смиренно в дар Богу принеся, добился еси в вышних селениях воспевати Ему: Аллилуиа.

Икос 2

Разум озаренный благодатию Божиею измлада имея, при храме святем, идеже отец твой Моисей в диаконстем сане служаще, воспитан был еси. Сего ради, видя благий плод отеческого наставления, зовем тебе таковая: Радуйся, сосуде благодатный, еще от утробы матерния предизбранный. Радуйся, пищею духовною изобильно напитанный. Радуйся, млеком учения евангельскаго напитанный. Радуйся, светом веры Христовой озаренный. Радуйся, пречудное добронравие явивый. Радуйся, кротостию, смирением и разумом всех удививый. Радуйся, еще от младых лет неизреченную сладость молитвы вкусивый. Радуйся, господа Иисуса Христа всем сердцем возлюбивый. Радуйся, праведный Ионо, Одесский чудотворце.

Кондак 3

Силою свыше в храме Божием укрепляем был еси праведне Ионо, егда тяжции скорби сиротства постигоша тя. Добронравия бо родительница твоя отдаде тя в Церковь Господню, да служитель Божий будеши. Хотяще же по стопам отчим управити путь твой, при кончине жития своего благослови тя словесы сими: «Хощу, дабы ты был пастырем добрым». Ты же, блаженне, благословение родительское свято исполнив, воистину добрый пастырь нам был еси, воспевая непрестанно Богу: Аллилуиа.

Икос 3

Имеяй богатство неоскудеваемое - Христа в сердце своем, аще и нищету велию претерпевал еси отрок богобоязненный, обаче дивное терпение показал еси, и посреде толиких лишений и озлоблений безропотно спасение свое совершал еси. Сего ради чествуем тя похвалы сими: Радуйся, скорбным и притрудным житием праведникам уподобился еси. Радуйся, и сам венцем праведности от Господа увенчался еси. Радуйся, не имый где главы подклонити, Спасителю своему подражал еси. Радуйся, яко от нищеты в прекрасный чертог Вседержителя внити сподобился еси. Радуйся, яко молитва усопшия матере твоея незримо тя в сиротстве заступаше. Радуйся, яко от бед, напастей и внезапныя смерти многажды тя избавляше. Радуйся, еще от юности твоея крестоношением Богу угодити потщался еси. Радуйся, яко в незлобии, терпении и благодарении Богу поучался еси. Радуйся, праведный Ионо, Одесский чудотворче.

Кондак 4

Бурею ярости лютыя возмутися диавол, егда духовно укрепившеся и утвердившеся, во диакона посвящен был еси, праведниче Ионо, а послежде за благочестие и доброе житие священническаго сана от святителя Никанора удостоился еси. Оный бо святитель о тебе тако пророчествова: «Се будущий добрый пастырь. Видех бо на нем сугубую благодать. Душа его горит священным пламенем». Уразуме бо диавол, губитель душ человеческих, яко крепкаго противоборца в тебе обрел есть. Ты же мечем пламенныя молитвы, чистым и непорочным житием силу вражию попрал еси. Сего ради, толикому дерзновению твоему дивящеся, вопием дивному во святых Своих Богу: Аллилуиа.

Икос 4

Слышаше, избранниче Христов, ближнии и дальнии величие духовнаго подвига твоего, радовахуся, ибо добраго пастыря в тебе обретоша, неусыпно бдящего над стадом своим, да не расхитит волк хищный словесныя твоя овцы, вопиющия ти: Радуйся, на пажити церковней чад твоих духовных упасл еси. Радуйся, мудрым водительством к вечному спасению управил еси. Радуйся, Пречистым Телом и Честною Кровию Господа нашего Иисуса Христа от Трапезы Божественныя напитал еси. Радуйся, наставление в вере, надежде и любви премудре преподал еси. Радуйся, чрез Таинства Святыя Церкве во ограду Отчу заблудшия овцы ввел еси. Радуйся, росою молитв твоих от зноя страстей тыя избавил еси. Радуйся, Архиерея Вечнаго, прошедшего небеса, слуго усерднейший. Радуйся, исполнителю заповедей Христовых преизряднейший. Радуйся, праведный Ионо, Одесский чудотворче.

Кондак 5

Боготечную звезду яви тя миру Солнце Правды Христос, возженную на тверди небесней неизреченными подвиги богоугождения. Ты бо ради ближняго себе, дом свой и домашних своих забывал еси, в бдениих, коленопреклонениих и пощениих плоть свою изнурял еси, здравие душевное и телесное страждущим подавал еси, да вси, от тебе помощь и избавление от недугов приявшии, согласно Богу взывают: Аллилуиа.

Икос 5

Видяще тя, иерее Божий Ионо, нищии и убозии яко страждущих благодетеля, плачущих утешителя и алчущих питателя, отовсюду притекла к тебе, заступление и прибежище от тебе получити хотяще. Сподобившеся же великих милостей и щедрот от тебе, вопияху со умилением таковая: Радуйся, пастырю милостивый. Радуйся, отче премилосердный. Радуйся, бессребренниче всехвальный. Радуйся, исцелителю безмездный. Радуйся, покровителю убогих прелюбезный. Радуйся, источниче дарований духовных неоскудный. Радуйся, всех притекающих пристанище спасительное. Радуйся, богатство бедных неиждиваемое. Радуйся, праведный Ионо, Одесский чудотворче.

Кондак 6

Проповедник силы и славы Божия явился еси, служителю Христов Ионо. Дивными бо чудесы землю нашу озарил еси, и слухом исцелений, от молитвы твоея содевающихся, вся окрестныя грады и веси исполнил еси. Издалеча бо страждущия, болящия и бесныя к тебе притекаху, и предстательством твоим здравие духовное и телесное обретаху, вопиюще Подателю всех благих Богу: Аллилуиа.

Икос 6

Возсиял еси праведностию жития твоего, святе Ионо, дела бо плотския, яже суть нечистота, непотребство, распри, бесчинство и подобная сим, отринул еси, плод же духовный, еже есть любы, радость, мир, долготерпение, кротость, воздержание, в себе со тщанием взрастил еси. Сего ради прославляем тя песнословии таковыми: Радуйся, вертоград души твоея обильным плодоношением украсивый. Радуйся, цветы добродетелей на ниве сердечней насадивый. Радуйся, росою молитв своих оросивый. Радуйся, дождем слезным сильно напоивый. Радуйся; делателю, паче иных потрудивыйся. Радуйся, сеятелю, мзду велию приявый. Радуйся, плод сторичный пожавый. Радуйся, хлевом небесным от жатвы сея чад твоих духовных напитавый. Радуйся, праведный Ионо, Одесский чудотворче.

Кондак 7

Хотя богохульное еретическое отгнати злосмрадие, непоколебимый исповедник православныя веры воистину явился еси, отче святый Ионо, твердо противостав богопротивному расколу обновленческому. Ревностне бо пагубу его обличал еси, и верных во истинней вере наставлял еси, да право славят Господа, поюще: Аллилуиа.

Икос 7

Новаго тя пророка, иже прозорливыми очесы грядущая провидел еси, зрим, отче праведный Ионо. Ты бо тайну беззакония, юже Откровение Иоанново предглаголет, верным предвозвестил еси и мерзость запустения, стоящую идеже не должно, нам, в последняя лета живущим христианам, предрекл еси. Сего ради, сбытие сих проречений ныне зряще, глаголем ти сице: Радуйся, людей православных примером жития своего во исповедничестве укрепляяй. Радуйся, лютаго безбожнаго гонения не страшитися научаяй. Радуйся, тьмочисленным ересем, отовсюду Отечество наше православное борющим, противостояти наставляяй. Радуйся, нечестивыя заблуждения тьмы века сего обличаяй. Радуйся, к венцем исповедническим истинных рабов Божиих предуготовляяй. Радуйся, своими молитвами ратовати на враги помогаяй. Радуйся, твердо блюсти святоотеческое предание призываяй. Радуйся, к неотступному исполнению святых канонов Церкве путеводствуяй. Радуйся, праведный Ионо, Одесский чудотворче.

Кондак 8

Странное чудо является притекающим к тебе, блаженне Ионо, священная твоя церковь. Зде бо молящеся, не на земли, а на небеси стояти мним. В ней же и малое моление пред ракою твоих мощей приносяще, велиих недугов приемлем исце­ление, аще токмо по Бозе упование на тя возложим, верно вопиюще: Аллилуиа.

Икос 8

Весь бе в вышних, богомудре Ионо, к нижним никакоже прилепляяйся, и уметы злобнаго борителя, иже на тя чрез богоборческую власть со всею силою восста, ни во что же вменяяй. Многими бо напастьми богоборцы ратоваху на тя, и в темницу мрачную ввергоша. Обаче изволением Божиим и молитвами чад твоих духовных от бед избавлен был еси, и вся козни вражия попрал еси, да зовем ти с любовию таковая: Радуйся, воине Христов, во вся оружия Божия облекийся. Радуйся, духи злобы поднебесныя победивый. Радуйся, вся стрелы разженния лукаваго угасивый. Радуйся, щитом веры вооруживыйся. Радуйся, в броню правды одеявыйся. Радуйся, чресла истиною препоясавый. Радуйся, шлем спасения на главу свою возложивый. Радуйся, меч духовный, еже есть глагол Божий, восприемый. Радуйся, праведный Ионо, Одесский чудотворче.

Кондак 9

Всякия утоли скорби, обстояния и болезни, благодатный наш заступниче, отче Ионо! К тебе бо с верою и упованием ныне прибегаем, и в сердцах наших умиленные молитвы тебе воссылаем, да подаси всем просящим у тебе в болезнех скорое врачевание, в бедах благоприятное утешение и от искушений присное избавление, вопиющим к Богу со благодарением и радостию: Аллилуиа.

Икос 9

Ветия боговещанныя не возмогут изрещи великаго твоего к Богу дерзновения, досточудне Ионо. Егда бо к пламенногорящему светильнику Отечества нашего, праведному Иоанну Кронштадтскому и всея России чудотворцу жителие Одессы приходяху, сей паки их отсылаше ко твоей святыне, глаголя: «Своего имате чудотворца, блаженнаго Иону, пастыря Свято-Николаевския церкве». Сему дивному глаголу о тебе всероссийскаго угодника внемлюще, взываем ти со благоговением таковая: Радуйся, Духа Божия вместилище. Радуйся, добродетелей жилище. Радуйся, лампадо Духа присногорящая. Радуйся, свеще благостыни светозарная. Радуйся, града Одессы похвало и ограждение. Радуйся, благочестия нерушимое утверждение. Радуйся, молитвенниче к Богу неустанный. Радуйся, Господом свыше призванный и оправданный. Радуйся, праведный Ионо, Одесский чудотворче.

Кондак 10

Спасти хотя души чад твоих духовных, от Бога вверенных твоему попечению, всечестный пастырю Ионо, бдел еси непрестанно над стадом своим, да ни едина от овец, в горах заблудши, в пропасть погибели впадет, и добыча диаволу обретется. Темже и мы, на предстательство твое у Престола Вседержителя уповающе, и на молитвы твоя надежду непреложну имуще, вопием прославльшему тя Господу: Аллилуиа.

Икос 10

Стена еси необоримая и твердый якорь спасения всем, в морстей пучине плавающим и в опасностех от морские треволнений сущим был еси, отче достоблаженне Ионо, денно и нощно об их избавлении моления воссылая и прошения о здравии и благоденствии Господу принося. Темже и ныне вси, в море уходящии, к раце мощей твоих прибегают и умиленные мольбы тебе возносят, зовуще таковая: Радуйся, стихии грозныя укрощаяй. Радуйся, бурю страстей греховных разгоняяй. Радуйся, обуреваемым спасительное пристанище подаваяй. Радуйся, тишину Божественную приносяй. Радуйся, блуждающих во мраце грехов добрый кормчий. Радуйся, от пути истины сократившихся наставниче. Радуйся, многих от власти диавола исхитивый. Радуйся, бесчисленных неврежденно сохранивый и спасый. Радуйся, праведный Ионо, Одесский чудотворче.

Кондак 11

Пение Богу и Пресвятей Богородице непрестанно в сердце твоем принося, добродетельных высот духа достигл еси, пребогате. Темже и дадеся тебе благодать не токмо в житии твоем, но и по блаженном преставлении ходатайствовати за ны, спасая и просвещая души всех, усердно взывающих к Богу: Аллилуиа.

Икос 11

Свет во тьме сущим и слепым прозрение был еси, приснопамятне отче Ионо. Силою бо, яже ти от Бога даровася, велие чудо исцеления слепорожденнаго отрока сотворил еси, и яже не возмогоша врачеве телеснии, молитвою своею совершити возмогл еси. Сему чудотворению презельне дивящеся, воздаем ти славословия сицевая: Радуйся, лютых и неисцельных недугов всемощный врачевателю. Радуйся, радости превеликия подателю. Радуйся, омраченных нечестием благое просвещение. Радуйся, слепотствующих светоподательное озарение. Радуйся, молитвы златая кадильнице. Радуйся, Духа Божественнаго всечестный ковчеже. Радуйся, Света Невечерняго присное сияние. Радуйся, непрестанное верных утешение и радование. Радуйся, праведный Ионо, Одесский чудотворце.

Кондак 12

Благодать, мир, жития исправление и грехов прощение испроси нам, великоимените пастырю Ионо, беспрестанне согрешающим и всеблагаго господа студными деянии прогневляющим. И не попусти ходатайством твоим миродержителю тьмы века сего обладати нами насильством тленнаго сего телесе. Настави же нас на путь спасения и от искушений неврежденных сохрани, да очистив совесть от всякия скверны, вопием в чистоте душевней Богу: Аллилуиа.

Икос 12

Поюще преславная твоя подвиги и чудеса, имиже Христос возвеличи тя, вернаго служителя своего, праведный отче Ионо, колена сердца нашего пред благостию Бога, таковаго угодника нам даровавшаго, преклоняем, и лобызающе всечестныя твоя мощи, усердныя моления о спасении душ наших воссылаем, зовуще ти со благоговением и любовию таковая: Радуйся, пастырем нашим образе трезвеннаго и достойнаго Богу предстояния. Радуйся, носителем благодати священства наставниче безпорочнаго служения. Радуйся, служителем алтаря правило веры и дерзновения. Радуйся, дражайшего сокровища нашего - веры Православныя вернейшее ограждение. Радуйся, Слова Божия богодохновенный учителю. Радуйся, святоотеческих преданий и церковных канонов неленостный блюстителю. Радуйся, всем верным истиннаго христианскаго жития присное наставление. Радуйся, всех святых небесный сотаинниче и сопричастниче. Радуйся, праведный Ионо, Одесский чудотворче.

Кондак 13

О, священне и достоблаженне отче Ионо, чудотворче пресвятый и пастырю предивный! Се, предстояще пред ракою честных мощей твоих, со слезами и умилением сердечным молим твою благостыню, да николиже оскудеет ходатайство твое пред Богом о нас грешных и недостойных, да богоприятными мольбами твоими пробавит Всевышний Господь милость Свою над боголюбивым градом и православным Отечеством нашим, да укрепит веру святоотеческую, да научит ны примером праведнаго твоего жития единому точию на потребу служити и угождати, и да подаст нам вечное спасение, во еже с тобою в селениих праведных воспевати непрестанно: Аллилуиа, Аллилуиа, Аллилуиа.

(Этот кондак читается трижды, а затем икос 1 и кондак 1)

Молитва праведному Ионе Одесскому

О предивный и преславный отче наш Ионо, пастырю праведный и человече Божий! К тебе, яко к великому молитвеннику и истинному наставнику, одержимых злыми духами разрешителю, православной веры поборнику, в нужде находящихся помощнику, немощных целителю, сирот и вдов покровителю, и всех с верою и любовию призывающих тя в молитвах, мы, чада твоя, прибегаем и усердно просим: не забуди нас смиренных и грешных, яви нам твое отеческое заступление, испроси нам у Господа богатые милости Его: земли плодоносие, воздухов благорастворение, дожди благовременны, покоя и тишины во днех наших, благочестия умножение, болящим здравие, скорбящим утешение, унывающим ободрение, сирым призрение, убогим снабдение, подвизающимся преспеяние и всем нам вечное спасение.

Ей, угодниче Божий! Умоли Всемилостиваго Бога даровати нам чудесную помощь и яко по молитвам твоим Господь воскресил дщерь твою и исцелил отрока слепаго, тако испроси у Господа исцеление немощей наших и душ спасение. Да твоим ходатайством вси спасаеми, едиными усты и единым сердцем прославим бога в Троице славимаго, Отца и Сына и Святаго Духа, и Его благодать, данную тебе во веки веков. Аминь.