Святителя Германа, архиепископа Казанского и Свияжского

На Господи возвах, глас 6:

Богоблаженне отче Германе,/ правды ради Царствия Христбва / вся, яже на земли, яко уметы вменив,/ ум твой безстрастием просветил еси,/ нищетою Христовою обогатився,/ путем непорочным течение совершил еси./ Темже и по преставлении твоем/ в нетлении пребывая,/ моли и нам от тления греховнаго// неврежденным быти.

Изволением Духа Святаго,/ избранием Церкве и державным гласом/ кормила Казанския паствы приял еси,/ юже управляя словом истины,/ тщался еси представити Христу,/ яко ниву благовозделанну./ Темже, святителю, имея дерзновение ко Господу,/ выну предстательствуй,/ веры и благочестия плодами изобиловатися ей// и всяким разноверием неплодствовати.

Яко Апостолом последователя верна/ и наставника светом благодати / слово растворяюща,/прежде темный, ныне же просвещенный град Казань,/ прием тя, радуется,/ паства же твоя, озаряемая светом жития твоего,/ вьну веселится:/ примером бо подвигов твоих/ на стези правыя наставляемии, / имамы тя путевождя благоприятна/ ко спасению душ наших.

Слава, глас 8:

Приидите, православных собори,/ светлыя Свияжския обители основателя/ и новопросвещенныя Церкве Казанския пастыря, / чудотворца Германа песненно восхвалим: / той бо, в благолепии святительства / принося жертву хваления, / и себе самаго приношаше/ в жертву благоугодну Богови,/ о словесном стаде своем,/ и словом Христовым,/ многи, во тьме блуждавшия неверия,/ ко свету веры направи./ Тем и по преставлении неоскудно источает дары// любовию почитающим память его.

На стиховне, слава, глас 3:

Отче Богомудре Германе,/ велик показался еси делы и словесы:/ пася словесное стадо/ на злачных пажитях слова Христова,/ из неверия в веру приводил еси/ и, благовествованием породив чада послушания,/ сия обручил еси чистотою Христу,// подающему мир душам нашим.

Тропарь, глас 4:

От юности иго Христово усердно восприми,/ бденными подвиги поста и молитвы прославился еси./ Отонудуже призывающу тя Богу на служение Церкви/ в новопросвещеннем царстве Казанстем,/ вкупе со святителем Гурием воззван был еси,/ идеже яко первоначалъник созданной тобою в граде Свияжске обители/ и достойный первосвятителю преемник явился еси./ Духом предстоя Престолу Владычню, / молися, святителю Германе, со святителем Гурием/ православней пастве во благочестии преспевати// и тьме иноверия светом веры разгнатися.

На хвалитех, стихиры, глас 6:

Приими, святителю, наше песненное хваление/ и вонми смиренной молитве нашеи,/ яко верный ходатай / и теплый молитвенник за ны Христу Богу,/ Егоже соделай милостива,/ да прошения наша тобою исполнит во благо// и спасение душ наших.

Слава, глас 2:

Храм всечестен Божией Матери воздвигл еси, / да под кровом Ея созиждеши себе и чад обители твоей во спасение./ Ейже молися, святителю,/ да благодатию Господа и мы созиждемся в храм Божий// и в жилище Духа Святаго.

Последние добавления